हतियारको त्रास कायमै

कान्तिपुर दैनिक
गाम -रोल्पा, फागुन ५
माओवादीले शान्ति सम्झौतामा हस्ताक्षर गरेपछि गाम-९ की तिला बुढामगरलाई शान्तिसँग बाँच्न पाउने आस लागेको थियो । उनले सोचेजस्तो शान्ति भने आएन ।
माओवादीले हतियार छाडेलगत्तै अर्को समूहले गाउँमा हतियारको आतंक मच्चाएको छ । गाउँभर हतियार बोकेकाहरू देख्दा उनलाई शान्ति स्थापना हुनेमा शंका लाग्न थालेको छ ।
'हिजो पनि हतियारबाट दुःख भोग्यौं,' १० वर्षे सशस्त्र युद्धलाई नजिकबाट भोगेकी उनले भनिन्, 'हतियार बोकेका मानिसहरू मेरै घरछेउ हिँड्छन् । शान्ति आएका बेला यी हतियारधारी गाउँमा किन आएका होलान् ?'
रोल्पाबाटै सुरु भएको माओवादी सशस्त्र युद्ध रोकिएको लामो समय भइसकेको छ । हतियारको युद्ध गरेका तत्कालीन विद्रोही माओवादी सरकारमा पुगिसकेका छन् । हतियार थन्क्याएर उनीहरूले सरकारको कमान्ड सम्हालेका छन् । गाउँमा भने जनयुद्धकालको जस्तै हतियारधारीको जगजगी छ ।
केही अघि प्यूठानको स्याउलीबाङ प्रहरी चौकीमाथि आक्रमण गर्ने मंगोलियन रिभेन्ज गु्रपका सदस्यहरू हतियार लिएर हिँडिरहेका थिए । चन्दा उठाउने र सदस्य बनाउने गु्रपका सदस्यहरूले माओवादीविरुद्ध लडाइँ गर्न गाउँलेलाई तयार बन्न आह्वान गरिरहेका छन् ।
अहिले गामलगायतका गाउँमा सरकारले पठाएका सुरक्षाकर्मी छ्याप्छ्याप्ती छन् । प्रहरी चौकीमाथि आक्रमण गरेर हतियार लुटेका रिभेन्ज गु्रपका सदस्यलाई नियन्त्रणमा लिन उनीहरूलाई परिचालन गरिएको हो । हतियारसहित गाउँ पसेको सुरक्षाफौजले गाउँलेलाई नियन्त्रणमा लिने, सोधपुछका नाममा आफू बसेको स्थानमा बोलाउने गर्दै आएको छ । गाउँघरमा मात्र होइन खोलानाला र वनपाखामा पनि सुरक्षाकर्मीले सूक्ष्म खानतलास गरिरहेका छन् । 'हतियारधारीलाई नियन्त्रणमा लिइछाड्ने योजना छ ,(केन्द्रिय प्रहरी बिशेष कार्यदल) स्पेसल टास्क फोर्सका प्रमुख ललित चन्दले भने ।

मूख्य पेजमा फर्कन यहाँ थिच्नुस्